Даниел Стојановски е освојувачот на ФПЛ.мк титулата за 2019/20!

Е, па, толку беше: долгата 2019/20 сезона заврши. По огромна пауза, и повеќе од заслужено, Ливерпул станаа премиерлигашки шампиони, Сити одново постигнаа повеќе од сто гола, Челзи и Јунајтед ги пополнија местата што водат во Лига на шампиони и оттаму ги исфрлија Лестер, а Спарси им го земаа на Вулвси второто место за Лига Европа; наредната сезона во Премиер лигата нема веќе да ги гледаме Норич, Вотфорд и Борнмут – а Лидс, Вест Бромвич и уште еден од Брентфорд, Фулам, Кардиф и Свонси ќе ги заземат нивните места.

За крај, се решивме да ви приготвиме неколку анализи на прикажаното сезонава од страна на најдобрите менаџери. Можете да скролате – а можете и да ја искористите содржината подолу за да скокнете до местото што најмногу ве интересира.

Конечна состојба во ФПЛ.мк лигата

Колку што беше возбудливо последното коло од Премиер лигата, толку не беше она од нашата ФПЛ.мк лига: сите поместувања беа од третото место по надолу. Првите двајца откако освоија безмалку исто поени во последново коло, ги задржаа водечките места.

Со други зборови, чест ни е и задоволство да го прогласиме за победник досегашниот лидер – Даниел Стојановски, чиј тим Консултанти сезонава собра 2385 поени – доволно за осмото место во Македонија и 4.271-то во свет.

Зад него, на втората позиција, сезоната ја заврши тимот MKD UTD на Кире Настовски кој, со 2363 поени може да се пофали со пласман во Топ 10,000 играчи во свет (8.882-ро место во свет) и во Топ 15 во Македонија (14-то место).

Со девет поени заостанување зад Кире, третото место во инаугуралната ФПЛ.мк лига го освои Royce United на Матеј Николовски, кој сезонава севкупно собра 2354 поени и заврши како 18-ти во Македонија и 11.679-ти во светот.

Сè на сè, вака изгледа заклучниот Топ 10 во ФПЛ.мк лигата:

Мини-анализа на битката од последното коло

Во последното коло, Даниел влезе со 23 поени пред Кире Настовски – но и толку самоуверен во својот тим што дури и одлучил да не прави никаков трансфер. И вистина – како што можете да видите од тимот долу – со 0,3 во банка баш и немало многу ни простор ни потреба за ротација. Дури и со погрешниот Ситиевец за капитен, Даниел собра 75 поени колово – благодарение на одличната средина, но и на головите на Ван Дајк и Ингс:

Победничкиот тим на Даниел за 38+ коло

Кире имал повеќе во банка (и на крајот останал со 1,5) и се одлучил за разумен трансфер: Кејн на местото од Хименез за капитен. Да отишол со Обамејанг, ќе го изненадел Даниел. Вака, нема многу што да жали, зашто дури и да го погодел капитенот (Де Брујне место Кејн), пак ќе завршел на второто место – макар и го играл Ландстрам место Тарковски.

Тимот на Кире Настовски за 38+ коло

Единственото поместување во Топ 3 во текот на последново коло го имавме на третата позиција, на која се проби Матеј Николовски иако заостануваше два поени зад Крсте Танчевски пред почетокот на последните натпревари сезонава. Крсте имаше зачувано два трансфери за последното коло (ги стави Стерлинг и Питерс место Ливерпулците, Салах и ТАА), но Матеј имаше цел џокер (FH) и ова подолу е тимот со кого очекуваше да се искачи нагоре по табелата. Благодарение на доцните напаѓачки поврати на Махрез – тоа и се случи, но веројатно не онолку места на колку Матеј се надевал.

Тимот на Матеј Николовски за 38+ коло

Детална анализа на сезоната на Даниел Стојановски

Шампионот Даниел имаше одлична сезона: како што можете да видите од графиконот подолу, тој влезе во Топ 10.000 непосредно пред прекинот поради КОВИД-19 и оттогаш само во две кола (32+ и 33+) не беше дел од најдобрите 0,13% менаџери во светот. Уште побитно, сезоната ја заврши шампионски: неговиот пласман во последното коло му е најдобриот пласман сезонава:

(клик за поголемо)

Уште пофантастично од одличниот пласман на Даниел сезонава е што истиот не му е ниту најдобар, ниту, пак, втор најдобар во кариерата: во сезоната 2014/15, Даниел завршил 2499-ти во свет, а четири сезони пред тоа, во 2010/11 – сезоната на Одемвинги, Бент и Енди Керол (да, имаше таква сезона) – верувале или не, само 25 играчи во светот биле подобри од Даниел! По мини-падот од претходниве три сезони (ако и воопшто може да се нарече така, зашто Даниел никогаш не паднал вон топ 2% ФПЛ менаџери во светот: најлош пласман му е 150.883-ти во светот), му честитаме на Даниел за враќањето во друштвото на елитните меѓу елитните – и му посакуваме наредна сезона, на десетгодишнината од неговиот Топ 30 пласман, да отиде и чекор погоре и да се радуваме на македонски ФПЛ шампион.

(клик за поголемо)

Да се вратиме уште еднаш на моментната сезона на Даниел и да споделиме неколку интересни податоци од нашата анализа. Трент Александер-Арнолд бил играчот кој Даниел го стартувал најмногу пати – во сите освен едно коло сезонава. Тој му донел и најмногу поени релативно на цената (27,27 поени на милион). Најефективен му бил Мохамед Салах – кој му донел 260 поени или 11,3 по коло. Голем дел од овие поени се благодарение на фактот што Даниел ја ставил капитенската трака на раката на Египќанецот дури десет пати сезонава – што му донело 158 поени. Само еднаш помалку капитен му бил Рахим Стерлинг (106 поени), а зад него следуваат Варди (5), Де Брујне (4) и Бруно Фернандеш (4); покрај наведените, Даниел имал само уште пет различни капитени сезонава: Рашфорд (два пати), Агуеро, Абрахам, Обамејанг и Мане (сите по еднаш). Севкупно, имал и половичен успех со изборот: капитенот го погодил 20 пати (вклучително и тројниот), а погрешил 18. Најмногу поени од својот капитен освоил во првото коло (Стерлинг, 2*20=40) и во дваесет и четвртото (Салах, TC: 16*3=48). Коло по коло, тоа изгледа вака:

(клик за поголемо)

Во просек, Даниел освојувал 62,76 поени по коло – и дури 31 пат имал повеќе поени од просекот! Исклучок од традицијата биле само следниве седум кола: 2, 5, 10, 14, 17, 18 и 23. Најдобро коло му било 34+ кога освоил 107 поени, а најлошо 18-тото – кога собрал само 36 (2 поени под просекот).

Севкупно Даниел направил 43 трансфери што го чинеле 20 поени – а му донеле, во просек низ сезоната, 93 поени повеќе отколку кога не би ги направел (значи, е во плус 73). Најчесто ја играл формацијата 3-4-3 (14 пати), но најмногу поени, во просек по коло, му донела 4-3-3 (75,57 поени по коло; ја изиграл седум пати). На клупа Даниел оставал по само 5,71 поени по коло или севкупно 217 сезонава – најмногу во 33+ коло кога Иган (10), Барнс (8) и Хендерсон (3) му собрале 21 поен без да му влезат во првата единаесетка.

Ништо страшно – особено ако се има предвид безмалку совршената втора полусезона за Даниел. Уште еднаш му честитаме на големиот успех, му посакуваме уште поголем нареднава сезона – и го покануваме да ни пише на Фејсбук.

Сезонска анализа на ФПЛ.мк лигата (Топ 50)

Ајде сега да се префрлиме накратко на ФПЛ.мк лигата и, како за крај, да споделиме со вас неколку занимливи статистики. Од логистички причини, предвид ги земавме само најдобрите 50 менаџери.

Вредност на тим

Шампионот Даниел Стојановски шампионски ги менаџирал и парите: највреден тим меѓу оние во Топ 50 е неговиот, со 108 милиони. Од четирите највредни тимови зад него, само Борис Симовски ги искористил парите на доволно добар начин за да се пласира во Топ 5 – останатите тројца се вон Топ 20.

Дека парите не се пресудни најдобар доказ е веројатно Баже Трифуновски: иако сезоната ја завршил со тим чија вредност е одвај малку над 100 милиони, неговиот конечен пласман е на 11-тото место во ФПЛ.мк лигата и меѓу Топ 30.000 менаџери во светот. Меѓу Топ 50 ФПЛ.мк менаџерите, има уште тројца со полоша вредност на тимот од него – но и со полош пласман:

Трансфери

Најмногу трансфери сезонава направил Виктор Стојановски – 95 или 2,5 по коло. Па, сепак, истите не го чинеле и најмногу поени (80). Сале Цветковски – кој сезонава ја заврши на 39-тото место во нашата лига – направил дури 14 трансфери помалку од Виктор (81 севкупно) но за нив платил дури 104 поени!

Од друга страна, најмалку трансфери направил менаџерот на Wilshere Fitness – само 29. Некако, и за толку малку трансфери, пак платил со дури 20 поени. Александар Бачески направил само еден трансфер повеќе (30) и тоа го чинело само 4 поени. На овој план, најдобро менаџирал Бојан Стојковски:  направил 40 трансфери – или, во просек, по малку повеќе од 1 трансфер по коло – и не платил ниту еден бод за нив. Тој е единствениот со ваков скор.

Поени на клупа

Кога правевме полусезонска анализа, откривме дека најнесреќен од аспект на менаџирањето на првата единаесетка беше Александар Стојановски. За жал, ништо не му се сменило до крај – Александар оставил дури 393 поени на клупа, или во просек по повеќе од 10 на коло! Не е единствениот со толку висок просек: сите во Топ 5 имаат просек повисок од 9 поени на коло оставени на клупа! Зачудувачки, меѓу нив е Матеј Николовски кој, и покрај тоа што оставил дури 360 поени на клупа, сезонава ја заврши на третото место во нашата лига и меѓу Топ 12.000 менаџери во светот!

Колку што биле горниве пет несреќни, толку оние во долната табела биле среќни: ниту еден не оставил повеќе од 150 поени на клупа низ целата сезона – или сите имаат просек понизок од 4 поени по коло оставени вон првата единаесетка. Најдобриот меѓу нив, Мартин Георгиевски, оставал, просечно, по само 3,2 поени на клупа по коло! Па, ајде сите така наредна сезона!

Топ 50, сортирлива табела

Доколку сакате да знаете повеќе за вашиот тим, повелете сортирлива табела на најдобрите 50 ФПЛ менаџери од нашата лига сезонава – па, слободно кликајте и споредувајте се. И уживајте наредниов месец – зашто многу брзо ќе дојде новата премиерлигашка сезона (12 септември). ФПЛ ќе дојде уште побрзо: ако се водиме по традицијата, би требало да можеме да почнеме да го планираме тимот за првото коло од 2020/21 веќе од 12-ти август.

А дотогаш – се одјавуваме и ние! Веројатно заслуживме малку одмор од анализи и најави. Се надеваме дека барем дел од нив ви помогнаа да остварите повисок пласман. Уште повеќе – се надеваме дека ќе се подобриме за наредна сезона. Поздрав!